Тони Стојановски е Главен извршен директор и претседател на Управниот одбор на НЛБ Банка Скопје од септември 2024 година. Тој е магистер по економски науки од областа на монетарната економија, банкарски професионалец со неколку децениско работно искуство во финансискиот сектор и долгогодишен член на релевантни одбори и организации. На челната позиција во НЛБ Банка Скопје, Стојановски дојде од Стопанска банка Скопје, каде што беше член на Управниот одбор 15 години, извршувајќи различни високо-раководни позиции. Претходно, Стојановски извршувал и високо-раководни функции во Народната банка на Република Северна Македонија, вклучувајќи ја и позицијата Генерален директор на Секторот за супервизија, банкарска регулатива и финансиска стабилност.

Игор Давчевски е Главен оперативен директор и член на Управниот одбор на НЛБ Банка Скопјe. Давчевски е професионалец во индустријата кој ја започнал својата банкарска кариера како Менаџер на одделот за картички во Интернационална приватна банка. Тој се приклучува на НЛБ Банка пред повеќе од 20 години, период во кој постојано извршува раководни функции, напредувајќи до член на Управниот одбор од јануари 2020 година. Специјализиран е во областа на стратешко и оперативно планирање, развој на производи, платни системи и технологии. Има универзитетска диплома од областа на електроника и телекомуникации и магистерски студии на Бледската школа за менаџмент.

Петер Зелен е Главен директор за ризици (CRO) и член на Управниот одбор на НЛБ Банка Скопје од јануари 2020 година. Со 26 години банкарско искуство и обемна менаџерска експертиза на различни лидерски позиции, Зелен носи солидна основа на својата позиција. Пред да се приклучи на НЛБ Банка Скопје, тој работел во НЛБ д.д. од 2010 година на раководни позиции концентрирани на управување со кредитен ризик, реструктуирање на долгови и надзор на нефункционални пласмани. Тој поседува и значајна експертиза во корпоративното кредитирање и кредитирање на население.  Зелен имал неколку позиции во надзорниот одбор во рамките на НЛБ Групацијата, а во моментов е заменик-претседател на Надзорниот одбор на НЛБ Приштина и претседател на Одборот за ризици.

Катерина Јанковиќ е финансиски експерт со над 20 години искуство во банкарскиот сектор. Работејќи за две големи банкарски групации – Société Générale и Steiermärkische Sparkasse, таа успешно напредува до високи менаџерски позиции, стекнувајќи длабоко познавање и искуство во корпоративно банкарство и банкарство за население, со особен фокус на продажна стратегија, планирање и воведување на нови банкарски продукти.

Во Управниот одбор на НЛБ Банка Скопје доаѓа од Шпаркасе Банка Скопје, каде од 2021 година ја извршуваше функцијата Директор на Секторот за население. Таа поседува длабоко познавање на финансиските пазари, регулаторните рамки и управувањето со ризици, и има истакнати комуникациски и лидерски вештини.

Нејзиниот стратешки пристап беше клучен за спојувањето и интеграцијата на Охридска и Шпаркасе Банка во 2021 година, потврдувајќи ја нејзината способност да управува со големи трансформации и комплексни деловни процеси.

Јанковиќ е дипломиран економист на Универзитетот „Св. Кирил и Методиј“ во Скопје и магистер по деловна администрација (MBA) во финансии на Универзитетот во Шефилд во Солун.